Парафіяне Чырвонага касцёла звярнуліся да Наталлі Пяткевіч
![Чырвоны касцёл / Еўрарадыё](/sites/default/files/styles/gallery_main/public/2023-08/czk-2609-0.jpg.webp?itok=f7hH9AvM)
Чырвоны касцёл / Еўрарадыё
Парафіяне Чырвонага касцёла звярнуліся да першай намесніцы адміністрацыі Лукашэнкі Наталлі Пяткевіч з просьбай дапамагчы вярнуць храм. Зварот да чыноўніцы апублікаваны на сайце парафіі.
Аўтары ліста адзначаюць, што будынак касцёла занепадае. У закрытым храме абсыпалася тынкоўка, гніюць фіранкі, дываны, псуюцца кнігі ў бібліятэцы, іконы, карціны і арган. Нагадаем, касцёл парафіі Святога Сымона і Святой Алены, па сутнасці, забралі ў вернікаў два гады таму. На рашэнне Мінгарвыканкама храм быў закрыты і апячатаны. Паведамлялася, што для рамонту пасля пажару. Парафіяне перакананыя, што пажару не было і рамонт храму не патрабаваўся, было невялікае ўзгаранне. Але аднаўленчыя работы ў прыбудове, дзе быў ачаг, так і не пачаліся.
"Мы, вернікі, адукаваныя людзі — усё разумеем! Але нам крыўдна і балюча назіраць, як у гістарычным шматпакутным Доме Божым няма набажэнстваў, малітваў. Няўжо мы, вернікі Беларусі, заслужылі такое пакаранне? Хіба вы чулі калі-небудзь недружалюбныя выказванні ад вернікаў на адрас дзяржавы?" — адзначаюць аўтары паслання.
Вернікі просяць Пяткевіч паспрыяць вяртанню храма. Яны таксама адзначаюць, што могуць сваімі сіламі зрабіць там неабходны рамонт. Раней з такой жа просьбай яны звярталіся да старшыні Савета Рэспублікі Наталлі Качанавай. Выніку гэта не прынесла.
![Прихожане Красного костела обратились к Наталье Петкевич](/sites/default/files/styles/default_image_paragraph/public/paragraphs/image/list_2.jpg.webp?itok=1lIqD0vr)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.