Пракурор запатрабаваў для анархіста Паліенкі 6 гадоў пазбаўлення волі
У Мінскім гарадскім судзе 23 кастрычніка пракурор папрасіў прысудзіць анархісту Змітру Паліенку 6 гадоў пазбаўлення волі ў калоніі строгага рэжыму. Залічыць яму час знаходжання ў СІЗА, а таксама прымяніць да яго амністыю (мінус год пазбаўлення волі).
Па версіі абвінавачвання, вечарам 13 сакавіка ў пад'ездзе дома па вуліцы Гурскага Зміцер Паліенка распыліў пярцовы газ у вочы Аляксею Юрыну. За тое, што той зрабіў Паліенку заўвагу наконт курэння ў пад'ездзе. Абвінавачаны сцвярджае, што Юрын ўдарыў яго ў галаву, а балончык ён выкарыстаў для самаабароны.
"Чалавек ужо ўсвядоміў тое, што ён зрабіў. Гэта малады чалавек. Навошта псаваць жыццё чалавеку? Ад мяне прашу вас, высокі суд, моцна чалавека не судзіць. Я не настойваю на строгім пакаранні", — сказаў пасля выступу пракурора пацярпелы Аляксей Юрын.
Прысуд Дзмітрыю Паліенку агучаць 25 кастрычніка ў 12.30.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
