Сірыя дазволіла экспертам ААН наведаць магчымыя месцы хіматакаў

Вызначаны і графік інспекцыі іншых месцаў, дзе, меркавана, ужывалася хімзброя. Пра гэта гаворыцца ў заяве афіцыйнага прадстаўніка сірыйскага ўрада.

Тым часам, Вялікабрытанія і ЗША папярэдзілі сірыйскія ўлады пра "сур'ёзны адказ" на ўжыванне хімічнай зброі, а Іран перасцярог заходнія краіны ад вайсковай кампаніі ў Сірыі.

Нагадаем, чарговае абвастрэнне сітуацыі ў Сірыі адбылося 21 жніўня, калі шэраг СМІ паведаміў пра маштабнае ўжыванне войскамі ўрада хімічнай зброі ў наваколлях Дамаска. Ахвярамі нападу сталі, па папярэдніх дадзеных, больш 600 чалавек. Кааліцыя нацыянальнай апазіцыі Сірыі сцвярджае, што колькасць ахвяраў магла дасягнуць 1,3 тысяч.

Пасля інцыдэнту бакі канфлікту неаднаразова заяўлялі пра сваю недатычнасць, вінавацячы ў тым, што здарылася, апанентаў, паведамляе "РІА "Навіны".