Страшны абстрэл Украіны і рызыка паводак у Еўропе — #ІхНоравы

29/12/2023 - 16:19

Навіны замежжа / @rubanau_collage

Расія ажыццявіла адзін з самых страшных абстрэлаў Украіны, а ў Чорным моры на расійскай міне падарвалася грузавое судна, якое ішло пад панамскім сцягам. З берагоў выходзяць рэкі ў Венгрыі, Германіі, Літве і Нідэрландах, а ў Італіі — чарговы наплыў бежанцаў. Падрабязней пра гэта чытайце ў традыцыйнай рубрыцы Еўрарадыё "Іх Норавы".

Усе ракеты — па Украіне

У ноч з чацвярга на пятніцу Адэса, Харкаў, Кіеў і іншыя гарады Украіны зазналі масіраваную паветраную атаку.

— Столькі чырвонага на нашых маніторах вельмі даўно не было відаць. Ва ўсіх абласцях, на ўсіх напрамках, — сказаў прадстаўнік паветраных сіл УСУ Юрый Ігнат.

З ягоных слоў, расійцы запусцілі ўсе ракеты, акрамя "Калібраў", а менавіта" Кінжалы", балістычныя, С-300, крылатыя ракеты, безспілотнікі, Х-22 або Х-32. Каля 18 стратэгічных бамбавікоў запускалі Х-101/Х-505.

Еўропа тоне?

З-за пастаянных дажджоў у некаторых еўрапейскіх краінах рэкі выходзяць з берагоў. Прагнозы сіноптыкаў аптымізму не выклікаюць.

У Будапешце з берагоў выйшаў Дунай — затопленыя ўзбярэжныя. Вада ў рацэ паднялася да адзнакі 6,93 метра — самай высокай з 2013 года. Паводка была выклікана праліўнымі дажджамі і снегам, які хутка растаў.

На выпадак падтапленняў у многіх месцах уздоўж ракі Эйсел у Нідэрландах на гэтым тыдні ўзводзіліся загароды. Улады хвалююцца, што вада там прыбывае вельмі хутка. Напрыклад, ейны ўзровень можа павышацца ажно на сантыметр у гадзіну.

Да забалочвання некаторых раёнаў і перанасычэння вільгаццю глебы прывялі дажджы ў Германіі — адвод вады ўскладнены.

Праз дрэннае надвор'е ёсць вялікая пагроза падтаплення паводкавымі водамі на захадзе Літвы. Хоць узровень вады ў мясцовых вадаёмах пачаў зніжацца, сіноптыкі прагназуюць, што ў найбліжэйшыя дні там выпадзе 15-25 мм ападкаў.

Найбуйнейшая рака краіны Нёман звычайна выходзіць з берагоў вясной. Але за апошнія два месяцы ўзровень вады ў ёй двойчы дасягаў крытычнай кропкі.

Калядны наплыў мігрантаў

1500 мігрантаў за чатыры дні калядных вакацый даплылі да берага Італіі. Пра гэта паведамляюць у Міністэрстве ўнутраных спраў краіны. У ведамстве тлумачаць такі наплыў добрымі ўмовамі надвор'я. Там удакладняюць, што рэкорднай выдалася серада: 27 снежня на італьянскае ўзбярэжжа прыбыло 723 чалавекі. Большасць з іх высадзілася на Лампедузе.

Членам НКА, якія праводзяць пошукавыя аперацыі ў Міжземнамор'і, не да святаў. Валанцёры Арганізацыі Sea-Watch выратавалі 118 мігрантаў, уключаючы тузін непаўналетніх, самаму малодшаму з якіх тры гады.