Synesis патлумачыў, чаму Шатроў адмовіўся ад аднаасобнага валодання кампаніяй

"Дзеянні па продажы акцый звязаныя з тым, што ў "Сінезіса" ёсць высокія шанцы на паспяховы вынік справы аб выключэнні кампаніі з "трэцяга пакета" санкцый", — сказана ў прэс-рэлізе, размешчаным на сайце Synesis. А персанальныя санкцыі супраць Аляксандра Шатрова там названыя "дадатковай "гарантыяй" для прадстаўнікоў ЕС у адстойванні пазіцыі адносна ІТ-кампаніі".

Таксама ў Synesis расказалі, як прасоўваецца абскарджанне санкцый у судзе Еўрасаюза. Пазоў быў пададзены 16 лютага — праз два месяцы пасля таго, як кампанія была ўнесеная ў блэкліст. На думку аўтара прэс-рэлізу, еўрапейскія бюракраты спецыяльна зацягваюць разгляд справы:

"Для таго каб абодва бакі былі максімальна падрыхтаваныя да судовага паседжання, паміж імі вядзецца перапіска адносна абставінаў справы, якая займае да 6 месяцаў, не лічачы часу на справаводства па рэгістрацыі і перасылцы адказаў бакоў.

Першы адказ ад Савета ЕС мы спадзяваліся атрымаць у сярэдзіне красавіка. Аднак у канцы лютага Еўрасаюз нязначна змяніў фармулёўкі аб уключэнні "Сінезіса" ў санкцыйны спіс. Праз гэта кампанія была вымушаная падаваць так званую modification (змяненне судовага пазову), таму што існавала рызыка застацца ў санкцыйным спісе па змененых фармулёўках нават у выпадку перамогі па першым пазове.

Падача modification расцягнула перыяд перадсудовай перапіскі яшчэ на два месяцы: у сувязі з унесенымі зменамі першы адказ Савета ЕС мусілі накіраваць не пазней за 17 чэрвеня, але на момант напісання тэксту ён не быў атрыманы. Персанальныя санкцыі ў дачыненні да Шатрова — гэта чарговая спроба падоўжыць дзеянне санкцый супраць кампаніі нават у тым выпадку, калі "Сінезіс» выйграе суд", — сказана ў стэйтменце кампаніі.

Там па-ранейшаму ўпэўненыя "ў аб'ектыўным разглядзе справы аб скасаванні санкцый у дачыненні да "Сінезіса" ў Еўрапейскім судзе".