Тэлеперсанаж Бяляеў: каго адправілі "нармалізоўваць" журфак БДУ
Аляксей Бяляеў / НДТРК
"Біяграфічныя партрэты беларускіх калабарацыяністаў у гады Вялікай Айчыннай вайны", — гучыць як чарговае выступленне генпракурора Андрэя Шведа, але не, гэта адна з публікацый новага дэкана журфака БДУ Аляксея Бяляева.
Еўрарадыё расказвае, хто цяпер будзе кіраваць журналісцкай "кузняй кадраў".
Змагар з калабарацыянізмам
Бяляеву 48 гадоў — малады ўзрост паводле мерак пасады, якую ён цяпер займае. У яшчэ маладзейшыя гады, калі яму быў усяго 31, ён абараніў кандыдацкую дысертацыю — па гісторыі.
Тэма: "Мясцовая дапаможная адміністрацыя ў сістэме нямецка-фашысцкага акупацыйнага рэжыму ў Беларусі (1941-1944 гг.)". І напісана гэта было ў 2005-м, гэта значыць, Бяляеў апярэдзіў сучасную апантанасць беларускіх уладаў тэмай калабарацыянізму.
