У Мінску прэзентавалі фільм пра катаванні
Стужку Вольгі Нікалайчык “Катаванні ў Беларусі. Апакаліпсіс” паказалі на “Марафоне Салідарнасці”.
Паказ адбыўся на сядзібе БНФ увечары 4 траўня. Стужка распавядае пра выпадкі жорсткага абыходжання з людзьмі прадстаўнікоў праваахоўных органаў. У фільме апісваюцца выпадкі экс-кандыдата ў прэзідэнты Алеся Міхалевіча, грамадзянскіх актывістаў Паўла Левінава і Андрэя Молчана, актывістак FEMEN.
На паказе прысутнічала жонка Алеся Міхалевіча Мілана. Менавіта Міхалевіч першы распавёў пра катаванні ў турме КДБ — пасля чаго быў вымушаны з’ехаць за мяжу, баючыся пераследу.
Пасля паказу рэжысёрка Вольга Нікалайчык зачытала апошнія лісты ад палітвязняў Мікалая Аўтуховіча, Яўгена Васьковіча і Алеся Малчанава. Прысутныя падпісалі палітвязням віншавальныя паштоўкі з Вялікаднём, якія вырабіла нясвіжская мастачка Наталля Бордак.
