"Указ пра пашпарты" ў Еўракамісіі лічаць непавагай да базавых правоў грамадзян
Беларускі пашпарт / "Белсат" / "Белсат"
Рашэнне беларускіх уладаў не выдаваць пашпарты праз амбасады — гэта непавага да базавых правоў грамадзян. Пра гэта на брыфінгу 7 верасня заявіў прэс-сакратар Еўракамісіі і Еўрапейскай службы знешніх дзеянняў Петэр Стана.
Ён адзначыў, што нелегітымны рэжым працягвае пераследаваць беларусаў, якія былі вымушаныя эміграваць праз пагрозу пераследу і рэпрэсій.
"Відавочна, гэта спроба прымусіць іх вярнуцца, каб, хутчэй за ўсё, падвергнуць іх рэпрэсіям. Гэта ў чарговы раз паказвае абсалютную непавагу з боку рэжыму да фундаментальных правоў грамадзян. Вядома, Еўрасаюз рашуча асуджае гэты ўказ і гэтую практыку, гэтае рашэнне", — сказаў Петэр Стана. Ад імя ЕС ён паабяцаў далейшую падтрымку беларускаму народу і яго запыту на дэмакратыю.
Петэр Стана дадаў, што палітыкам ЕС патрэбны час, каб зразумець, якія рэальныя цяжкасці ўзнікнуць у грамадзян Беларусі, якія знаходзяцца на тэрыторыі Еўрасаюза.
