Застацца на парадку дня: Беларусь бярэ ўдзел у святкаванні 75-годдзя СЕ

15/05/2024 - 13:45

Савет Еўропы / Conseil de l'Europe

Беларусь удзельнічае ў мерапрыемствах, прысвечаных 75-годдзю Савета Еўропы. Нашу краіну, хоць яна ніколі і не ўваходзіла ў гэтую арганізацыю, прадстаўляе саветніца Святланы Ціханоўскай Маргарыта Ворыхава. У мінулым годзе яна была абраная з супрэзідэнткай Кансультатыўнай рады па моладзі СЕ.

"Я паразмаўляю з прадстаўнікамі МЗС розных краін пра праблемы, якія хвалююць беларускую моладзь: візы, студэнцкая мабільнасць і пра іншыя", — кажа Еўрарадыё Ворыхава.

Посмотреть эту публикацию в Instagram

Публикация от Еўрарадыё | euroradio.fm (@euroradio)

На канферэнцыі для моладзевых актывістаў, у якой яна ўдзельнічае, пройдуць асобныя сустрэчы з кіраўнікамі МЗС і пасламі краін Савета Еўропы. Ёсць і іншыя магчымасці пагутарыць з дыпламатамі. Чаму гэта важна?

“Мы сустракаемся з прадстаўнікамі розных краін, якія ўдзельнічаюць у прыняцці рашэнняў. Чым часцей мы падымаем пытанні беларускай моладзі і Беларусі ў цэлым — тым вышэй падымаем нас на парадку дня, у спісе прыярытэтаў краін. Прымушаем іх прымаць выгадныя нам рашэнні. Напрыклад, у палітыцы адносна беларускай моладзі ў розных краінах, у прыёме беларускіх студэнтаў у розныя ўніверсітэты, удзеле ў розных мерапрыемствах", — тлумачыць Маргарыта Ворыхава.

Без міжнародных мерапрыемстваў Беларусь хутка знікне са спісу прыярытэтаў еўрапейскіх краін, дадае яна. Бо ў чыноўнікаў і дыпламатаў шмат і іншых тэм для абмеркавання: ад вайны ва Украіне да непасрэдных пагроз дэмакратыі ў сваіх краінах.

"Удзел у падобных мерапрыемствах, удзел Святланы Ціханоўскай на розных пляцоўках як раз падтрымлівае нашу прысутнасць на парадку дня і тое, што мы да гэтага часу атрымліваем так шмат падтрымкі", — дадае суразмоўца.

Удзел у моладзевых мерапрыемствах Савета Еўропы — не прэрагатыва тых беларусаў, хто з'ехаў з краіны. Як кажа Маргарыта, часта праходзяць трэнінгі, канферэнцыі і іншыя падзеі, на якія могуць падавацца беларусы незалежна ад месца жыхарства. За анонсамі можна сачыць на сайце СЕ.

Маладыя беларусы могуць атрымліваць і грантавую падтрымку на свае праекты: існуе Еўрапейскі моладзевы фонд, які заўсёды гатовы прафінансаваць розныя актыўнасці і мерапрыемствы.

Дзверы адчыненыя

Савет Еўропы супрацоўнічае з беларускай моладдзю ўжо некалькі дзесяцігоддзяў. Як, калі Беларусь ніколі не была часткай арганізацыі? Дырэктар моладзевага дэпартамента Савета Еўропы Тобіяс Флесенкемпер тлумачыць, што неўзабаве пасля атрымання незалежнасці краіна ратыфікавала Еўрапейскую культурную канвенцыю, і гэта было асноўнай рамкай супрацоўніцтва. Праўда, у канцы 2023-га ўрад "прыпыніў" удзел у Канвенцыі.

Іншым шляхам была праца непасрэдна з моладзевымі арганізацыямі-шлях, на які не ўплывае далучэнне да СЕ або ратыфікацыя канвенцый. Таму гэта працягваецца.

"Хоць стасункі з Беларуссю пасля пачатку поўнамаштабнай расейскай агрэсіі супраць Украіны практычна цалкам спыніліся, глыбокія сувязі паміж грамадзянскай супольнасцю і Еўрапейскім моладзевым рухам не былі перапыненыя. Для грамадзянскай супольнасці дзверы застаюцца адкрытымі", — тлумачыць Тобіяс Флесенкемпер.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.