Затрыманых актораў РТБД выпусцілі з Акрэсціна

На волю выйшлі затрыманыя раней акторы Рэспубліканскага тэатра беларускай драматургіі (РТБД), піша Reform.news са спасылкай на крыніцу ў тэатральных колах.

Як расказвала Еўрарадыё, пра затрыманне трох актораў з асноўнага складу РТБД стала вядома 19 кастрычніка.

Іх асудзілі на 13 сутак паводле абвінавачання ў дробным хуліганстве (арт.19.1 КаАП). Праз адсутнасць актораў тэатр быў вымушаны здымаць з паказу некаторыя пастаноўкі.

Паводле інфармацыі Reform.news, артыстаў выпусцілі з Цэнтра ізаляцыі правапарушальнікаў на Акрэсціна 30 кастрычніка.

РТБД, як і большасць беларускіх тэатраў, моцна пацярпеў у выніку рэпрэсій апошніх гадоў. За чатыры гады адтуль сышлі ці былі звольненыя з палітычных прычынаў каля дзясятка актораў. Напрыканцы 2021-га звольнілі мастацкага кіраўніка тэатра Аляксандра Гарцуева, а сёлета ў ліпені — дырэктарку Святлану Карукіну.