Жылы раён “Зялёны Бор” пад Мінскам пачнуць будаваць не раней за 2026 год
Планы змяніліся: будаўніцтва новага раёна адкладаецца на год / blisch.by
Улады Мінска перагледзелі тэрміны будаўніцтва вялікага жылога раёна “Зялёны Бор” пад Мінскам у раёне пасёлка Калодзішчы. Цяпер актыўнае будаўніцтва запланавана на 2026 год. У 2025 годзе грошы выдзелены толькі на пад'ездную дарогу, інжынерныя сеткі і іншую інфраструктуру.
Гэта стала вядома з абноўленай інвестыцыйнай праграмы будаўніцтва новых аб’ектаў у 2025 годзе за кошт бюджэту Мінска. Раней менавіта гэты год быў пазначаны як пачатак будаўніцтва новага раёна. Канцэпцыю “Зялёнага Бора” прадставілі ўпершыню ў 2012 годзе.
Што гэта за праект
Новы жылы раён размесціцца за тэрыторыяй Калодзішчы-2 на месцы былога вайсковага палігона.
У праекце прадугледжаны два этапы будаўніцтва:
1-ы этап (да 2030 года): забудова 952 тыс. м², разлічаная на 36,5 тыс. чалавек.
2-і этап (пасля 2030 года): павелічэнне насельніцтва да 105 тыс. чалавек (104 тыс. — у шматкватэрных дамах, 1 тыс. — у сядзібным фондзе).
Па задуме праекціроўшчыкаў, у “Зялёным Бары” дамы сярэдняй павярховасці будуць размяшчацца па краях, а ў цэнтры з’явяцца шматпавярховыя будынкі. Горадабудаўнічы праект прадугледжвае фарміраванне 11 раёнаў, аб’яднаных зялёнымі зонамі і магістралямі.
