Ашуканцы падрабілі старонкі банкаў і скралі ў кліентаў 110 тысяч рублёў

За два месяцы ашуканцы праз фішынгавыя старонкі беларускіх банкаў спісалі з карт-рахункаў беларусаў каля 110 тысяч рублёў. Адзін з удзельнікаў афёры — 21-гадовы жыхар Брэста — затрыманы, расказалі ў прэс-службе УСК па Магілёўскай вобласці.

Пацярпелымі па гэтай справе прызнаныя 112 чалавек. Гісторыя пачалася ў лістападзе мінулага года. Змоўшчыкі брастаўчаніна "стварылі фішынгавыя інтэрнэт-рэсурсы, візуальна падобныя да афіцыйных сайтаў некалькіх банкаў Рэспублікі Беларусь, а таксама віртуальную гандлёвую пляцоўку", расказалі ў СК.

Калі кліенты банкаў уводзілі ў пошукавы радок браўзера запыт на ўваход у інтэрнэт-банкінг, адной з першых спасылак з'яўлялася спасылка на фішынгавую старонку. Візуальна яна была падобная да старонкі банка. Кліент уводзіў дадзеныя, але ажыццявіць плацёж не мог. А потым у яго з карт-рахунку знікалі грошы. "Ніхто з карыстальнікаў, заходзячы на фішынгавую старонку, не заўважыў падвоху", — адзначылі ў Следчым камітэце.

Затрыманаму брастаўчаніну выставілі абвінавачванні ў "замаху на крадзеж маёмасці шляхам мадыфікацыі камп'ютарнай інфармацыі" і "ў легалізацыя сродкаў, атрыманых злачынным шляхам". Расследаванне крымінальнай справы завершанае, матэрыялы перададзеныя пракурору для накіравання ў суд.

Матэрыялы ў дачыненні да змоўшчыкаў фігуранта вылучаныя ў асобную вытворчасць. Але хто яны, невядома.  Следству яшчэ трэба будзе высветліць іх асобы.