Як выглядае рэканструкцыя “Дынама”? (Фота)

10/06/2013 - 12:08

Мінскі стадыён “Дынама” крок за крокам мяняе аблічча. Будаўнікі збольшага разабралі так званы брыль ― верхні ярус заходняй трыбуны. Але ўжо відавочна, што скончыць рэканструкцыю у наступным годзе будзе немагчыма. Рабочыя пакуль не ўзяліся нават за дэмантаж асвятляльных “мачтаў”.

“Стаіць задача зрабіць гэта да канца лета. Але, наколькі я ведаю, у будаўнікоў ёсць цяжкасці, ― распавядае Юрый Крывадубскі, дырэктар “Дынама”. ― Заказчыкам выступае Упраўленне капітальнага будаўніцтва Мінгравыканкама, і пакуль не могуць знайсці падрадчыка на некаторыя працы. Але, я так разумею, бліжэйшым часам гэта адбудзецца, і працы пачнуцца”.

Еўрарадыё: Калі могуць скончыць разбор стадыёна і пачаць непасрэднае стварэнне новага аблічча?

Юрый Крывадубскі: Я не будаўнік па адукацыі, але ведаю, што першы крок ― гэта праект рэканструкцыі стадыёна, як мінімум, у архітэктурнай стадыі. Яго стварэнне працягваецца. Будўніцтва можна пачынаць, калі такі праект прайшоў экспертызу. Пасля трэба распрацоўваць далейшыя стадыі.

Еўрарадыё: Калі рэканструкцыя можа быць цалкам скончаная? Выглядае, што ў 2014-2015-ых гадах гэтага не здарыцца…

Юрый Крывадубскі: Я магу толькі рабіць спасылкі на еўрапейскі досвед. Праектаванне займае каля 8-і месяцаў. Будаўніцтва аб’ектаў такога ўзроўню, як наш, ― каля трох гадоў. Я не будаўнік, не праекціроўшчык, не магу за іх адказваць. Але ў Еўропе, калі будуюць, арыентуюцца на такія лічбы. Верагодна, што праектаванне пройдзе больш хутка. Але, я так разумею, што лічбы не могуць адрознівацца на парадак. Два з паловай-тры гады на гэта, відаць, спатрэбіцца. У нас ёсць прыклады “Мінск-арэны”, “Чыжоўка-арэны”. Я не думаю, што рэканструкцыя “Дынама” можа быць завершаная хутчэй.

Такім чынам, калі скласці прыкладныя тэрміны разнастайных прац, то першы матч на абноўленым “Дынама” можа быць згуляны не раней за кастрычнік 2016-га года. Кошт рэканструкцыі, калі грунтавацца на іншых праектах нямецкай кампаніі GMP, можа быць не меншым за 120 мільёнаў еўра.