КДБ вербаваў беларускага журналіста, абяцаючы кватэру
Брэсцкі журналіст Яўген Скрабец кажа, што яго спрабавалі завербаваць супрацоўнікі КДБ пры спробе ўладкавацца на працу.
Скрабец кажа, што хацеў уладкавацца начальнікам сектара турызму, маркетынгу і знешнеэканамічнай дзейнасці ў ў аўтапарк №1 ААТ "Брэстаблаўтатранс". Дырэктар аўтапарку паведаміў хлопцу, што яго працаўладкаванне залежыць ад размовы з двума людзьмі.
Па словах Скрабца, якія перадае Радыё "Свабода", яму прапанавалі падпісаць паперу аб добраахвотнай супрацы з КДБ. За гэта яму абяцалі пасаду і жыллё ў панэльным доме. Наўзамен хлопец павінен быў працягваць займацца грамадскай дзейнасцю і распавядаць кадэбістам пра новыя моладзевыя рухі, якія могуць з'явіцца ў Брэсце, пра ўкраінскіх знаёмых, якія прыязджаюць у Беларусь і г.д.
Скрабец кажа, што адмовіўся супрацоўнічаць са спецслужбамі.
