Лукашэнка: Прадпрымальнікі просяць спыніць усялякія падатковыя рэформы

Аляксандр Лукашэнка 16 лютага праводзіць нараду па актуальных пытаннях падатковай палітыкі.

Па яго словах, цяпер у Беларусі няма магчымасці даваць падатковыя льготы ў ранейшым аб'ёме. "Калі раней на пэўным этапе ў нас была магчымасць прадастаўляць падобныя падатковыя льготы, цяпер іншыя часы. Ад індывідуальных ільготаў наогул, напэўна, трэба сыходзіць", — перадае БЕЛТА словы кіраўніка дзяржавы.

Разам з тым Лукашэнка лічыць, што для прыярытэтных відаў дзейнасці падатковыя льготы можна пакінуць. Гаворка ідзе пра сферы, "якія прадстаўляюць інтарэс для дзяржавы з пункту гледжання стварэння ўмоў для эфектыўнага развіцця і, вядома ж, атрымання аддачы".

Разам з тым, беларускі кіраўнік заявіў, што часта змяняць падатковыя стаўкі — недапушчальна. "Шчыра кажучы, можа, варта адзін раз па максімуме адкарэктаваць, каб потым некалькі гадоў усім спакойна працаваць?" — цытуе БЕЛТА яго словы.

Лукашэнка адзначыў поспехі ў рэфармаванні падатковай галіны. Але ён паведаміў, што ўжо і прадпрымальнікі просяць, каб спынілі ўсялякія рэформы ў падатковай сферы, бо патрэбная стабільнасць.

На падатковых ільготах бюджэт Беларусі недаатрымаў каля мільярда долараў

Фота — president.gov.by