На журналістку склалі пратакол за ўдзел у "Жывым ланцугу" супраць інтэграцыі

Акцыя адбылася 7 снежня, у дзень, калі Аляксандр Лукашэнка і Уладзімір Пуцін абмяркоўвалі інтэграцыйныя дакументы на сустрэчы ў Сочы. Тады міліцыя нікога не затрымлівала, але супрацоўнікі ў цывільным здымалі ўдзельнікаў "Жывога ланцуга" на відэа. У Ленінскім РАУС Мінска, які наведала Быкоўская, ёй паказалі яе фота буйным планам.

"У сваю чаргу я прызнала, што знаходзілася ў вызначаны час каля Галоўпаштампту для падтрымкі незалежнасці Беларусі. Але віны сваёй не пабачыла, бо была там у адпаведнасці з правамі, дадзенымі мне Канстытуцыяй", — тлумачыць сваю пазіцыю Вольга Быкоўская.

"Упэўненая, што зараз важна выступаць у падтрымку суверэнітэту, — працягвае журналістка і актывістка. — Улады не толькі не могуць даць сваім грамадзянам гарантыі яго абароны, але і выкарыстоўваюць карны апарат супраць тых для каго незалежная Беларусь безумоўная каштоўнасць".