Латвія заклікае Беларусь не парушаць правы журналістаў
МЗС Латвіі накіравала Беларусі ноту ў сувязі з затрыманнем журналіста Латвійскага радыё Угіса Лібіеціса.
Міліцыянты схапілі журналіста ў Мінску 29 чэрвеня ў часе “маўклівай акцыі”, а пазней карэспандэнта адпусцілі, паведамляе ІА REGNUM.
“Мы патрабуем, каб улады Беларусі старанна расследавалі інцыдэнт і надалей не дапускалі падобных абмежаванняў журналісцкай дзейнасці”, — гаворыцца ў ноце.
Міністр замежных справаў Латвіі Гірт Валдзіс Крыстоўскіс падкрэсліў, што парушаць правы журналістаў, калі яны выконваюць свае прафесійныя абавязкі, недапушчальна. На думку міністра, такія крокі беларускіх уладаў не спрыяюць узаемаразуменню і добрым адносінам паміж дзвюма краінамі.
