Зміцер Шурхай абскардзіў складзены ў Горках пратакол па пошце
Брэстаўчанін будзе дамагацца таго, каб на тэрміновыя пікеты не трэба было падаваць папярэднія заяўкі.
Каардынатар ініцыятыўнай групы па стварэнні БХД па Брэсцкай вобласці Зміцер Шурхай даслаў поштай заяву для суддзі, якая разглядае яго справу. Ён быў затрыманы 2 жніўня на пікеце каля Горацкай калоніі і назаўтра адпушчаны з Горацкага райсуда, бо запатрабаваў адваката.
Спадар Шурхай не згодны з тым, што пікет у Горках трэба кваліфікаваць як несанкцыянаванае мерапрыемства. Прычына: людзям стала вядома, што жыццю дастаўленага ў калонію Зміцера Дашкевіча пагражае небяспека, таму і заяўляць акцыю за 15 дзён не выпадала.
“Чалавеку пагражала небяспека, і трэба было ў хуткім тэмпе гэта правесці. Зараз мы з праваабаронцам Раманам Кісляком рыхтуем зварот у парламент, каб у Закон аб масавых мерапрыемствах былі ўнесеныя змены і каб была магчымасць такога тэрміновага пратэсту, каб людзі маглі выказваць пратэст без папярэдняга заяўлення”, — сказаў Зміцер Шурхай у інтэрв’ю Еўрарадыё.
Нагадаем, што 2 чэрвеня ў Горках былі затрыманыя 14 чалавек, дзесяць з іх атрымалі адміністратыўны арышт, двое штрафы. Яшчэ двое — Зміцер Шурхай і Іван Шыла, адпушчаныя па адваката да 8 жніўня. Абодва дыстанцыйна хадайнічалі аб пераносе разгляду з прычыны нястачы грошай на праезд.
