У Беларусі вайскоўцы адпрацоўвалі спыненне прарыву праз мяжу

У Беларусі вайскоўцы адпрацоўвалі спыненне прарыву "падраздзяленняў умоўнага праціўніка" праз мяжу. Паводле легенды, яны прасоўваліся ўглыб краіны. У вучэннях былі задзейнічаны мотастралковыя падраздзяленні пры падтрымцы артылерыі і беспілотнікаў. Адбываліся яны на Гожскім палігоне (знаходзіцца ў 15 км ад мяжы з Літвой і ў 20 км ад мяжы з Польшчай).

Як паведамляе Мінабароны, гэта быў этап праверкі боегатоўнасці Узброеных сіл з баявой стральбой. За ім на месцы назіраў дзяржсакратар Савета бяспекі РБ Аляксандр Вальфовіч.

"Створана батальённая тактычная група механізаванай брыгады Заходняга аператыўнага камандавання, якая была прыведзена ў названыя тэрміны ў баявую гатоўнасць, — расказваў генерал Вальфовіч. — Батальён здзейсніў марш у раён палігона, дзе атрымаў задачу адбіць раптоўны пераход дзяржаўнай мяжы праціўнікам, нанесці яму агнявое паражэнне і ажыццявіць пераслед, знішчэнне і выхад на дзяржаўную мяжу".

Паводле слоў дзяржсакратара Савета бяспекі, падчас вучэнняў выкарыстоўваецца досвед вайны ва Украіне. Правяраецца не толькі наяўнасць беспілотнікаў у падраздзяленнях, але і тое, як вайскоўцы могуць іх выкарыстоўваць і ўмеюць ад іх абараняцца. Аляксандр Вальфовіч нагадаў, што "створаны пэўныя падраздзяленні ў кожным механізаваным батальёне менавіта па супрацьдзеянні і прымяненні беспілотных лятальных сродкаў".