Уладзімір Макей расказаў пра вынік Мінскіх пагадненняў для Беларусі
Дзякуючы Мінскім пагадненням заходнія палітыкі змянілі свой погляд на нашу краіну. Такое меркаванне выказаў міністр замежных спраў Уладзімір Макей на міжнароднай канферэнцыі "Мінскія пагадненні праз год: дасягненні, выклікі, урокі". Мерапрыемства з удзелам міжнародных экспертаў з краін нарманскай чацвёркі (Расія, Украіна, Францыя, Нямеччына) праходзіць у чацвер у мінскім гатэлі "Рэнесанс".
Кіраўнік беларускай дыпламатыі ў адказах на пытанні журналістаў паведаміў, што "мінскі фармат" апраўдаў сябе. Калі б усе бакі прытрымліваліся абяцанняў, прынятых на перамовах у Мінску, то канфлікт на ўсходзе Украіны даўно быў бы спынены, заявіў Макей.
Карэспандэнт Еўрарадыё пацікавіўся ў міністра, што для Беларусі змянілі мінскія перамовы.
Макей: "Напэўна, гэта паўплывала на тое, як на Беларусь пачалі глядзець на Захадзе і тыя ці іншыя палітыкі ў Еўропе. Яны бачаць, што наша імкненне з'яўляецца шчырым, што мы не спрабуем атрымаць тут нейкія палітычныя дывідэнды. Мы сапраўды зацікаўленыя ў тым, каб ва Украіне як мага хутчэй усталяваўся мір".
