З Непала ў Маскву даставілі яшчэ адну грамадзянку Беларусі
Жанчына ездзіла ў Непал турысткай.
4 траўня з Непала ў Маскву даставілі яшчэ адну грамадзянку Беларусі. Пра гэта агенцтву БЕЛТА паведаміў прэс-сакратар амбасады Беларусі ў Расіі Аляксандр Гардзейчык.
Беларуску разам з групай расіян прывезлі самалётам МНС Расіі ў маскоўскі аэрапорт Дамадзедава. Там яе сустрэў супрацоўнік беларускай амбасады.
Паведамляецца, што жанчына была ў Непале турысткай. Яна не ведае, ці ёсць яшчэ нашыя суайчыннікі ў пацярпелым ад землятрусу рэгіёне.
Нагадаем, што 29 красавіка з Катманду самалёт расійскіх ратавальнікаў даставіў двух грамадзян Беларусі.
Магутны землятрус у Непале адбыўся 25 красавіка. Паводле апошніх звестак, яго ахвярамі сталі больш за 7200 чалавек.
