Жонка Юрыя Зянковіча распавяла аб спробе разабрацца ў справе мужа

Алена Дзенісавец, жонка затрыманага ў Маскве амерыканскага адваката беларускага паходжання Юрыя Зянковіча, мае намер адмовіцца ад паслуг дзяржаўнага абаронцы і наняць іншага адваката. Юрысту, які ў цяперашні час прадстаўляе інтарэсы яе мужа, яна не давярае. Пра гэта яна распавяла ў інтэрв'ю "Радыё Свабода".

Адвакат сам патэлефанаваў Дзенісавец, прадставіўся і пацвердзіў, што Зянковіча затрымалі ў Маскве. Паводле яго слоў, зараз Зянковіч знаходзіцца ў статусе падазраванага, але пры гэтым артыкул, па якім распачата крымінальная справа, назваць адмовіўся.

"Сказаў, што дэталі паведаміць не можа", — распавяла Дзенісавец. Пра тое, што яе мужа падазраюць у тэрарызме, ёй раней казалі супрацоўнікі маскоўскай гасцініцы, якія бачылі, як затрымлівалі Зянковіча.

Акрамя таго, Дзенісавец збянтэжыла, як адвакат апісаў стан яе мужа.

"Паводле адваката, выглядае Юрась выдатна. Кажа, паголены, ружовенькі, свежы. Калі так кажуць, то чалавек хлусіць, я так лічу. У Юрася няма там ніякіх рэчаў, яму трэба штодня прымаць лекі ад ціску", — адзначыла жонка Зянковіча.

Зянковіч быў затрыманы амаль адначасова з палітолагам Аляксандрам Фядутам і старшынёй Партыі БНФ Рыгорам Кастусёвым. Прычым Фядуту затрымалі меркавана таксама ў Маскве. Дзенісавец не ведае, ці планаваў яе муж сустракацца з палітолагам, але знаёмыя яны былі.

"Юрась даўно ў БНФ, які ўзначальвае Кастусёў. Ён з партыі не выходзіў, ён жа і палітык. Але я ня ведаю, ці меўся ён з імі сустракацца", — кажа Дзенісавец.

Яна таксама нагадала, што ў Маскве Зянковіч быў па справах бізнесу. Дзенісавец ўжо кантактавала з прадстаўнікамі амбасады ЗША ў Мінску. Па яе словах, дыпламаты маюць намер дамагацца сустрэчы з затрыманым. У Зянковіча два грамадзянства — Беларусі і ЗША.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.