Ці можна зарабіць на натальных картах? Гісторыя беларускі

29/08/2024 - 11:59

Гісторыя ведычнага астролага / Shutterstock

— У мяне дзве адукацыі: інжынерная і эканамічная. І наогул, тэхнічны склад розуму. Усяму, што можна праверыць, я магу паверыць. Усё, што праверцы і навуцы не падлягае, я не разглядаю, — расказвае Еўрарадыё ведычны астролаг Анастасія (імя змененае).

Апошнія некалькі гадоў цікавасць да ведыйскай (ці індыйскай) астралогіі, якую вывучае нашая суразмоўніца, прыкметна вырасла. Пакуль адны людзі па-ранейшаму ставяцца да гэтай сістэмы ведаў скептычна, іншыя чытаюць натальныя карты, дапамагаюць сваім кліентам спазнаць сябе і знайсці адказы на цяжкія пытанні, за што атрымліваюць не толькі падзяку, але і грошы.

Звычайная лухта ці апора ў жыцці ў любой незразумелай сітуацыі? Бізнес ці падпрацоўка? Каму лепш наогул ніколі не лезці ў гэтую сферу?

Паспрабуем разабрацца на асабістым прыкладзе нашай суразмоўніцы.

Што такое ведыйская астралогія і чым яна прывабная

— Я пачала займацца ведыйскай астралогіяй, калі зразумела, што гэта працуе, — сцвярджае Анастасія.

Раней, як і большасць людзей, дзяўчына магла пацікавіцца, у каго які гараскоп, пажартаваць наконт несумяшчальнасці прадстаўнікоў тых ці іншых знакаў задыяку, дзеля цікаўнасці пачытаць прагноз на дзень.

— Такі падыход мне здаваўся проста забаўным, шмат увагі гэтаму я ніколі не надавала. Але потым некалькі незнаёмых адно з адным людзей расказалі мне пра ведыйскую астралогію, якая крыху інакш разглядае натальныя карты. Я зацікавілася і вырашыла паспрабаваць скласці сваю карту ў інтэрнэце.

Ведыйская астралогія (ці Дж'ёціш) — гэта сістэма ведаў, якая з'явілася тысячы гадоў таму. Яе карані знаходзяцца у Старажытнай Індыі. Астролагі запэўніваюць, што з дапамогай яе можна прааналізаваць мінулае, зазірнуць у будучыню і знайсці адказы на надзённыя пытанні.
Дж'ёціш абапіраецца на законы пераўвасаблення і кармы. Згодна з ёй, усё, што адбываецца ў жыцці чалавека, невыпадковае: тое, што чалавек рабіў у мінулым, уплывае на яго цяперашняе жыццё і будучыню.
У адрозненне ад заходняй, індыйская астралогія абапіраецца на становішча саміх зорак, то-бок на "нерухомы" задыяк. Складаючы натальную карту, спецыяліст пытае ў кліента не толькі дату яго нараджэння, але яшчэ час і месца.

Як праходзіць працэс навучання

Анастасія здзівілася, наколькі дакладным аказалася апісанне па яе натальнай карце. Паводле суразмоўніцы, яно было ясным і канкрэтным. Як цікаўны і ўедлівы чалавек дзяўчына вырашыла пайсці далей і вывучыць тэму як мага глыбей.

— Спачатку я скончыла адну школу, потым пайшла ў іншую, дзе вучылася ўжо на больш сур'ёзным узроўні. Цяпер у мяне ў планах пайсці ў трэцюю школу, каб пашырыць свае веды ў прагностыцы.

Атрымаўшы адукацыю ў дзвюх школах, я ўжо магу трактаваць карты, вывучаць натальную карту чалавека, карту яго душы, бачыць яго кармічныя задачы і гэтак далей. У 90 са 100 выпадкаў чалавек кажа: "Усё менавіта так".

Как можно заработать на астрологии? История белоруски

Зоркі, якія гавораць праўду / unsplash.com

Дзяўчына расказвае, што ў першай школе, у якую яна трапіла ў 2021 годзе і дзе адвучылася тры месяцы, настаўнік спрабаваў адаптаваць старажытную індыйскую астралогію да сучасных умоваў, "таму шмат важнай інфармацыі не даносіў". Там яна атрымала базавыя веды. У другой школе, дзе Анастасія вучылася паўгода, падыход быў больш традыцыйны. Тут вучылі па класіцы індыйскай астралогіі. Курс складаўся з лекцый і практычных семінараў, скончыўся — тэстам і атрыманнем сертыфіката.

Першы досвед навучання абышоўся Анастасіі ў 50 тысяч расійскіх рублёў (цяпер гэта каля 1700 BYN), кошт другой школы быў прыкладна такі самы.
Паводле суразмоўніцы, цяпер з'явілася вельмі шмат розных школ і настаўнікаў, і цэны навучання падняліся ў два разы.

— Як правіла, навучанне ідзе два курсы: першы — уводны, другі — больш сур'ёзны з прагностыкай (там можна атрымаць некалькі прыступак). Астатнія веды (напрыклад, працуючы з канкрэтнымі сітуацыямі) вучні дабіраюць на семінарах і вебінарах.

Можна вучыцца ў Індыі, дзе таксама працуюць рускамоўныя выкладчыкі — жыць у храмах і цалкам занурацца не толькі ў індыйскую астралогію, але і ў індыйскую культуру.

Анастасія папярэджвае: выбіраючы школу, трэба ўважліва вывучыць інфармацыю пра яе. Паглядзіце відэа на ютубе, пачытайце, што пішуць у тэматычных групах у сацыяльных сетках (чым больш падпісчыкаў, тым цікавейшай можа быць школа), зайдзіце на сайт. У некаторых школах выкладаюць людзі, якія ў іх жа і вучыліся.

Як выглядае праца ведыйскага астролага

Анастасія расказвае, што, пакуль вучылася, складала натальныя карты ўсім сябрам і родным — так прыходзіў досвед. Чытаць карты было цікава, бо яна была ў курсе асабістых гісторый сваіх блізкіх.

Новыя кліенты з'явіліся пасля атрымання сертыфікатаў.

— Кліент дасылае мне месца, час і дату свайго нараджэння, на аснове чаго я складаю натальную карту, — працягвае суразмоўніца. — Натальная карта — гэта працоўны інструмент, якім карыстаюцца як ведыйскія астролагі, так і заходнія. Праўда, выглядаюць гэтыя карты па-рознаму. Кажучы прасцей, натальная карта — гэта фатаграфія неба на момант вашага нараджэння.

Карта складаецца вельмі хутка. Ёсць спецыяльныя сайты і праграмы, дзе можна гэта зрабіць.

Склаўшы карту, я знаходжу асноўнае сузор'е, якое ўзыходзіла на небе, калі кліент нарадзіўся, гляджу, дзе была планета, якая кіруе гэтым сузор'ем, дзе былі Сонца і Месяц. І вось па размяшчэнні гэтых планет і зорак можна меркаваць, які вы чалавек — адкрыты, закрыты, да чаго схільны і гэтак далей.

У ведыйскай астралогіі кожны чалавек — гэта не адно сузор'е (не Леў, не Рак, не Казярог), а адразу 12, якія размяркоўваюцца на небе згодна з яго сферамі жыцця. І ў кожнай сферы жыцця мы можам выяўляць сябе па-рознаму. У залежнасці ад таго, пад якім сузор'ем вы нарадзіліся, размяркоўваюцца астатнія сузор'і па вашым лёсе. Нейкія сферы для вас будуць лёгкімі, нейкія — складанымі.

Гледзячы на размяшчэнне планет, можна зразумець, якія кармічныя задачы стаяць перад кліентам. Што вы прынеслі з сабой з мінулага жыцця і што павінныя зрабіць у гэтым жыцці. Ёсць планеты, якія кажуць пра гэта больш канкрэтна, ёсць тыя, якія ствараюць перашкоды, каб мы развіваліся.

Трактоўка карты можа займаць шмат часу. Усё залежыць ад экспертнасці астролага, узроўню падрыхтоўкі і ад яго жадання размаўляць з кліентам падрабязна. Хтосьці глядзіць глыбока, хтосьці — павярхоўна. Хтосьці адказвае на запыт (напрыклад, калі чалавека цікавіць нешта па бізнесе або асабістым жыцці) і не будзе адцягвацца на іншыя моманты.

Трактуючы карту, я ўсё падрабязна запісваю — на гэта ў мяне можа пайсці 36 гадзін чыстага часу. Потым я дасылаю інфармацыю кліенту і ў выпадку неабходнасці праводжу кансультацыю. Некаторым яна не патрэбная. Ужо прачытаўшы "інструкцыю", чалавек можа глыбей зразумець сябе і зрабіць нейкія высновы.
Самая доўгая кансультацыя, якую я праводзіла, доўжылася восем гадзін — фактычна цэлы працоўны дзень. Але, яшчэ раз паўтаруся, так працуюць не ўсе. Я разумею, што многім проста хочацца выгаварыцца і, увогуле, мне цікава слухаць рэакцыю. Ёсць спецыялісты, якія абмяжоўваюць час. У школах ведыйскай астралогіі вучаць, як рабіць гэта правільна.

Ці можна разбагацець на ведыйскай астралогіі?

Анастасія кажа, што ў яе ёсць асноўная праца, а астралогія — гэта хутчэй падпрацоўка і задавальненне асабістай цікаўнасці. Аднак за некалькі гадоў у яе з'явіліся кліенты не толькі ў Беларусі, але і ў іншых краінах. Некаторыя стаяць у чарзе, бо часу ў астролага хапае ўсяго на адну-дзве кансультацыі ў месяц.

— Той, хто ўспрымае астралогію як асноўную працу, актыўна вядзе сацсеткі, запісвае відэа, запрашае да сябе новых кліентаў, — працягвае спецыялістка. — На гэта ідзе шмат сіл. У мяне ўсё адбываецца праз сарафаннае радыё: звярнуўся адзін чалавек, расказаў іншаму — і пайшло-паехала.

Цана складання натальнай карты і кансультацыі астролага ў Беларусі вар'юецца ад 100 рублёў да 200 еўра. У Расіі гэта яшчэ даражэй. Пасля падрабязнай кансультацыі людзі часам вяртаюцца, каб абмеркаваць нейкія важныя для іх пытанні. Такія кансультацыі ўжо таннейшыя.
У прынцыпе, тыя астролагі, якія не марнуюць на гутаркі з кліентамі па восем гадзін і праводзяць кансультацыі часта, могуць на гэтым зарабіць. Ёсць прафесіяналы, якія адкрываюць школы і зарабляюць на навучанні новых спецыялістаў.

Неба можна падсвятліць / unsplash.com

Каму нельга ісці ў астралогію

Чытаючы гэты матэрыял, слухачы Еўрарадыё могуць прыйсці да высновы, што, правучыўшыся год у анлайн-школе ў ведыйскага астролага, чалавек атрымлівае веды, якімі можна сабраць нядрэнны капітал. У дадатак, дзякуючы інтэрнэту, кансультаваць кліентаў можна з любога месца свету. Ну чым не праца мары?

— Людзям, не гатовым глыбока занурацца ў гэтую сістэму, не варта займацца астралогіяй, — кажа Анастасія. — За паўгода ў школе вы атрымаеце толькі павярхоўнае навучанне і, калі будзеце ўспрымаць сістэму толькі як спосаб узбагаціцца, можаце сур'ёзна нашкодзіць сваім кліентам.
Праца астролага — гэта праца з людзьмі. Калі вы не цікавіцеся псіхалогіяй і вам не ўласцівая эмпатыя, лепш не пачынайце. Пачаткоўцы часта робяць памылкі. Напрыклад, яны прачыталі па карце, што кліентка ніколі не выйдзе замуж, і ў лоб ёй гэта кажуць, а гэта ўсяго толькі імавернасць.
А яшчэ ў ведыйскай астралогіі ёсць правіла: калі ты свядома кажаш чалавеку няпраўду, ты можаш істотна сапсаваць сабе карму. Адказнасць астролага павінная ў некалькі разоў перавышаць любую іншую адказнасць.

Што будзе з Беларуссю і беларусамі?

Паводле суразмоўніцы Еўрарадыё, ні адно з сур'ёзных рашэнняў у Індыі не прымаецца без кансультацыі ў ведыйскага астролага. Больш за тое, там ёсць нават цэлае Міністэрства астралогіі.

А з якімі пытаннямі звяртаюцца да астролагаў беларусы?

— Як і раней, людзей цікавіць тэма адносін, дзяцей, бізнесу і самаразвіцця. Ну і, вядома, улічваючы наш няпросты час, кліенты часта звяртаюцца з экстраннымі пытаннямі. Напрыклад: "Ці варта з'язджаць з краіны?", "Ці бяспечна заставацца?", "Пасадзяць ці не?"

А ці можна даведацца, калі які-небудзь палітык пакіне сваю пасаду? Ці, напрыклад, скласці натальную карту асобнай дзяржавы і паглядзець, што там далей?

Паводле Анастасіі, з гэтым складана. Многія баязлівыя палітыкі наўмысна хаваюць час свайго нараджэння, а падчас складання карты ён мае вельмі вялікае значэнне. Што да будучыні краіны, то з гэтым яшчэ цяжэй — асабліва калі яе то дзялілі, то яна ўваходзіла ў нейкі саюз. Ёсць астролагі, якія спецыялізуюцца менавіта на гэтай тэме, але іх вельмі мала.

— Увогуле, вывучыўшы пытанне, я пераканалася, што ведыйская астралогія — гэта не нейкая там эзатэрыка, а сапраўды навука [астралогія не з'яўляецца навукай. — Еўрарадыё], — падсумоўвае спецыялістка. — І чым глыбей ты яе вывучаеш, тым больш пачынаеш разумець, як працуюць яе законы. Па натальных картах можна ўбачыць нават прыблізны час смерці чалавека. На шчасце, ніводнага з маіх кліентаў гэта не цікавіла.