Кілеру "банды Марозава" прысудзілі менш, чым Сяргею Ціханоўскаму
19 студзеня Гомельскі абласны суд вынес прысуд кілеру гомельскай "банды Марозава" Сяргею Дзербянёву. Яму прысудзілі 15 гадоў калоніі ўзмоцненага рэжыму. За Дзербянёвым лічыцца прынамсі восем забойстваў.
"Банда Марозава" — адна з самых буйных, якія дзейнічалі ў Беларусі ў 1990-х. Дзербянёў быў адным з яе лідараў. Ён быў абвешчаны ў міжнародны вышук, і шукалі яго 15 гадоў. Толькі ў 2019-м яго затрымалі ў расійскім Уладзівастоку з пашпартам на чужое імя.
У 2020-м мужчыну экстрадзіравалі ў Беларусь, і цяпер асудзілі на 15 гадоў за "забойства з асаблівай жорсткасцю дзвюх і больш асоб".
Такія ж 15 гадоў нядаўна прысудзілі блогерам Ігару Лосіку і Уладзіміру Цыгановічу. А Сяргея Ціханоўскага пакаралі нават большым тэрмінам — 18 гадамі.
