Расійскі дэзерцір праз Беларусь уцёк у Польшчу
Расійскі вайсковец (ілюстрацыйнае фота) / ria.ru
Расійскі дэзерцір праз Беларусь уцёк у Польшчу, паведамляюць у сераду польскія памежнікі. Яны яго затрымалі пасля таго, як 41-гадовы мужчына нелегальна перайшоў беларуска-польскую мяжу.
"У дачыненні да яго вядуцца далейшыя дзеянні", — гаворыцца ў паведамленні. Іншыя падрабязнасці пакуль невядомыя.
Дэзерцір перайшоў мяжу ў цывільным адзенні (відаць, разам з мігрантамі з краін Азіі і Афрыкі), без зброі, пры ім былі расійскія вайсковыя дакументы, дзейны кантракт для ўдзелу ў вайне супраць Украіны. У расіян безумоўна ўзнікнуць пытанні да беларускіх памежнікаў.
Праблема дэзертыраў з расійскага войска ва Украіне стала ўсё больш сур'ёзнай. Вайскоўцы ўцякаюць нават групамі (а сярод іх і замежнікі-найміты). Апошнім часам у РФ ішоў пошук 57-гадовага малодшага сяржанта, які расстраляў 6 расійскіх вайскоўцаў на фронце і ўцёк з аўтаматам.
