У Іспаніі затрыманы злачынцы, якія гандлявалі беларускамі і ўкраінкамі

Беларусак і ўкраінак заваблівалі абяцаннямі афіцыйнага працаўладкавання ў Іспаніі. Ім прапаноўвалі працу хостэс і абслуговага персаналу. Ахвяр знаходзілі праз сацсеткі, прадстаўляючыся мэнэджэрамі кадравага агенцтва.

Жанчын прывозілі ў Іспанію па турыстычных візах, а потым яны траплялі ў клуб у горадзе Альмерыі на поўдні краіны, дзе іх прымушалі займацца прастытуцыяй.

“Ахвяр размяшчалі ў трох дамах, прадстаўленых адным з кіраўнікоў клуба. Падазроныя ізалявалі жанчын ад грамадства, спрабуючы мінімізаваць рызыкі выяўлення злачынства паліцыяй або ўцёкаў жанчын. Гэта дазволіла ім поўнасцю ўтрымліваць, кантраляваць і эксплуатаваць пацярпелых”, — расказваюць у Еўраполе.

Там таксама адзначылі, што на ахвярах зараблялі "велізарныя грошы".