80 тысяч дзяцей у Беларусі жывуць у малазабяспечаных сем'ях

Улады Беларусі выхваляюцца, што ў краіне стала менш бедных. Паводле афіцыйнай статыстыкі, у 2019 годзе малазабяспечаных (гэтак слова "беднасць" перакладаецца на чыноўніцкую мову) было цэлых 5%. А ў 2023 годзе засталося "толькі" 3,6%.

Быццам бы — прыкметна палепшала, ажно на 28%. Але сітуацыю складана назваць радаснай. Бо 80 тысяч дзяцей у Беларусі жывуць у малазабяспечаных сем'ях.

Што значыць "малазабяспечаныя"

Сям'я лічыцца малазабяспечанай, калі даход на адну яе асобу ніжэйшы за рэгіянальны пражытачны мінімум. У 2023-м ён складаў ад 339 да 367 рублёў на чалавека.

Як чалавек можа пражыць на такія грошы месяц — пытанне рытарычнае.

Колькасць бедных значна адрозніваецца ад рэгіёна да рэгіёна. Да прыкладу, у Мінску і Мінскай вобласці іх 1,1% і 2,6% адпаведна. Гэтыя два рэгіёны сур'ёзна паляпшаюць статыстыку па краіне.

У іншых абласцях сітуацыя выглядае прыкметна горш.

Больш за ўсё бедных — на Магілёўшчыне

У Магілёўскай вобласці ў 2023 годзе пражывала 5,5% малазабяспечаных. Недалёка адсталі таксама Гомельская (5,2%), Брэсцкая (5,1%) і Віцебская (4,9%) вобласці.

На Гродзеншчыне сітуацыя крыху больш пазітыўная — тут вельмі нізкі даход мелі 2,7% жыхароў.
Бедных традыцыйна было больш на вёсцы, чым у горадзе: 6% супраць 2.9%.

Чым больш дзяцей — тым бяднейшая сям'я

Яшчэ адзін індыкатар, па якім можна вызначыць працэнт беднага насельніцтва — гэта хатнія гаспадаркі. Інакш кажучы — адзін чалавек ці група людзей, якія жывуць пад адным дахам.