"ЕС гатовы рэагаваць на рэпрэсіі": Барэль асудзіў прысуд Бяляцкаму

Кіраўнік еўрапейскай дыпламатыі Жазэп Барэль назваў прысуды сябрам праваабарончага цэнтра "Вясна" палітычна матываванымі. Ён адзначыў, што ЕС гатовы рэагаваць на рэпрэсіі Лукашэнкі супраць беларусаў.

— Еўрапейскі Саюз самым рашучым чынам асуджае іх фіктыўныя судовыя працэсы, якія з'яўляюцца яшчэ адным жахлівым прыкладам таго, як рэжым Лукашэнкі спрабуе прымусіць замаўчаць тых, хто выступае ў абарону правоў чалавека і асноўных свабод людзей у Беларусі. У Лукашэнкі не атрымаецца. Іх заклік да свабоды гучыць гучна нават за кратамі.

ЕС заклікае да неадкладнага і безумоўнага вызвалення больш за 1450 палітычных зняволеных у Беларусі. Іх жорстка пераследвалі за тое, што яны адважыліся супрацьстаяць парушэнням правоў чалавека ў Беларусі і адрынулі вайну Расіі супраць Украіны і ролю Беларусі ў гэтай агрэсіі. ЕС гатовы рэагаваць на рэпрэсіі і парушэнні правоў чалавека з боку рэжыму ў дачыненні да свайго насельніцтва.

3 сакавіка нобелеўскага лаўрэата Алеся Бяляцкага пакаралі 10-ю гадамі калоніі, Валянціна Стэфановіча — 9-ю, Уладзіміра Лабковіча — 7-ю. Змітра Салаўёва пакаралі 8-ю гадамі калоніі завочна.