Лукашэнка: Прызначэнні на вышэйшыя дзяржаўныя пасады сёлета працягнуцца

Аляксандр Лукашэнка 16 студзеня выступіў на пасяджэнні Савета Рэспублікі. Ён прадстаўляў новага старшыню праўлення Нацбанка Паўла Калаўра.

Паводле слоў Лукашэнкі, прызначэнні на вышэйшыя дзяржаўныя пасады сёлета працягнуцца: "У краіне ратацыя кадраў — працэс пастаянны. Таму прызначэнні на вышэйшыя дзяржаўныя пасады, асабліва ў год прэзідэнцкіх выбараў, будуць працягнутыя, але асноўны касцяк сфармаваны".

У той жа час кіраўнік дзяржавы падкрэсліў, што новыя кіраўнікі павінны быць "годнай заменай дасведчаным і кваліфікаваным прафесіяналам". Што да тых, хто саступае дарогу маладзейшым, дык усе яны гатовыя "падстрахаваць" сваіх наступнікаў, выступіць у ролі экспертаў. Лукашэнка прызнаўся, што "ніводнага чалавека... не звольніў і не перасунуў без яго згоды", інфармуе БЕЛТА.

Варта адзначыць, што сёння былы прэм'ер Міхаіл Мясніковіч быў адзінагалосна зацверджаны на пасадзе старшыні Савета Рэспублікі.

Фота: БЕЛТА