Тяжело седому пацану: у Гуцарыева поўна праблем і без "беларускіх" санкцый

"Тяжело седому пацану" — гэта трэк у жанры рускага шансона на словы Гуцарыева. Так, ён яшчэ і паэт. Расказваем, як нялёгка апошнім часам даводзіцца інгушскаму бізнесмену і без усялякіх "беларускіх" санкцый з боку Еўрасаюза.
 

Даўгі і страты

Першы раз сур'ёзныя праблемы з бізнесам у Міхаіла Гуцарыева пачаліся ў 2007 годзе. У Расіі на яго пачалі крымінальную справу па падазрэнні ва ўхіленні ад выплаты падаткаў і незаконнай прадпрымальніцкай дзейнасці. У выніку мільярдэр праз Мінск паляцеў у Лондан, дзе хаваўся да тых часоў, пакуль справу не закрылі. Цікава, што менавіта на "лонданскі" перыяд жыцця Гуцарыева прыпадае з'яўленне ў Лукашэнкі брытанскага паліттэхнолага Цімаці Бэла: той павінен быў змяніць вобраз кіраўніка Беларусі і спрыяць нармалізацыі стасункаў з Захадам.

Міхаіл Гуцарыеў змог вярнуцца ў Расію, але прычыны для галаўнога болю на гэтым не скончыліся. У 2017 годзе на мяжы банкруцтва апынуўся Бінбанк, які належыць яго сям'і. Ратаваць яго прыйшлося Цэнтрабанку. Бізнесмен страціў актыў, на яго пасыпаліся патрабаванні пагасіць частку выдаткаў. У рамках міравых пагадненняў (гэта значыць без суда) Гуцарыеву давядзецца заплаціць больш за 220 мільярдаў расійскіх рублёў (каля $3 млрд долараў па цяперашнім курсе).

Няўдачы чакалі Гуцарыева і на іншых кірунках. Напрыклад, ключавы дэвелаперскі актыў, кампанія "Маспрамбуд", некалькі гадоў мае буйныя страты, на фоне чаго расце крэдыторская запазычанасць. У "мінус" ідзе і бізнес у сферы здабычы вугалю.

Французская кампанія Total ужо звярнулася ў цэнавае агенцтва S&P Global Platts з просьбай забяспечыць гарантыю, што партыі нафты ў яго гандлёвай сістэме не належаць кампаніям Гуцарыева. Як піша Reuters, яшчэ некалькі перапрацоўшчыкаў адмаўляюцца ад куплі нафты з яго кампаній.

Нюанс яшчэ і ў тым, што акцыянерам "Руснафты" значыцца швейцарская Glencore. Ёй цяпер супрацоўнічаць з Гуцарыевым таксама не з рукі, асабліва ўлічваючы тое, што кампанія перапрадае яго нафту праз тое ж агенцтва S&P Global Platts.

Reuters піша, што некаторыя банкі адмовілі ў выдачы аплаты прадукцыі кампаніям, звязаным з Гуцарыевым. Супрацоўніцтва пастаўлена на паўзу. Праўда, ніводнага брэнда інфармагенцтва не называе.

Важны нюанс: у брытанскіх санкцыйных спісах Гуцарыева, якому належыць зарэгістраваны ў Вялікабрытаніі нафтатрэйдар, няма. Аднак яго магчымасці гандляваць абмяжоўваюцца еўрапейскімі санкцыямі. Дый не факт, што Лондан не дадасць яго ў блэкліст пасля таго, як дапоўніць "доказную базу".

Праблемы тэарэтычна могуць паўстаць і ў гандлёвай сеткі "М.Відэа": ёй складана будзе працаваць без еўрапейскіх пастаўшчыкоў. Акцыі кампаніі на фоне навін пра санкцыі прыкметна патаннелі.