Следчы камітэт адмовіўся пачынаць крымінальную справу за гібель Тарайкоўскага

19/02/2021 - 10:57

Следчы камітэт не будзе пачынаць крымінальную справу па факце гібелі Аляксандра Тарайкоўскага. Пра гэта старшыня СК Іван Наскевіч заявіў у каментары дзяржаўнаму інфармагенцтву БЕЛТА па выніках праверкі, праведзенай яго ведамствам.

Тарайкоўскі загінуў уначы 10 жніўня каля станцыі метро "Пушкінская", дзе пратэстоўцы спрабавалі ставіць барыкады, а сілавікі разганялі іх.

Паводле версіі СК, прыкладна ў 23 гадзіны Тарайкоўскі аддзяліўся ад натоўпу пратэстоўцаў і пайшоў у бок сілавікоў. Наскевіч заяўляе, што Тарайкоўскі быў моцна п'яны і ігнараваў шматлікія папярэджанні сілавікоў.

"Сваімі дзеяннямі Тарайкоўскі правакаваў праваахоўнікаў, яны не ведалі яго сапраўдныя матывы і мэты яго дзеянняў, а з улікам аператыўнай інфармацыі аб магчымых тэрактах, наяўнасці ў пратэстоўцаў выбуховых рэчываў, зброі ўспрымалі яго як рэальную пагрозу жыццю і здароўю як супрацоўнікаў, так і саміх пратэстоўцаў", — заявіў старшыня СК.

Па словах Наскевіча, сілавікі дзейнічалі ў рамках сваёй кампетэнцыі і выкарысталі супраць Тарайкоўскага несмяротную зброю з бяспечнай адлегласці. "У сілу збегу шэрагу трагічных абставінаў адно з раненняў аказалася пранікальным, у выніку якога смерць Тарайкоўскага наступіла на месцы здарэння", — дадаў ён.

Следства вырашыла, што сілавікі дзейнічалі ў адпаведнасці з законам і ў тых умовах "мелі права выкарыстоўваць несмяротную зброю для прадухілення больш цяжкіх наступстваў".

Як бачна на некалькіх відэароліках з месца здарэння, Тарайкоўскі стаяў насупраць шэрагу сілавікоў у майцы і шортах, падняўшы абедзве рукі ўверх.

У студзені ў інтэрнэце з'явіўся запіс з голасам, падобным да цяперашняга намесніка міністра ўнутраных спраў Мікалая Карпянкова, які расказваў, што Тарайкоўскага забілі з расійскага траўматычннага пісталета Ярыгіна:

"Мы, атрымліваецца, узялі ўчора каробку кардонную, у чатыры разы яе склалі, паставілі на крэсла, узялі і выпрабавалі. Атрымліваецца, кардонная каробка наскрозь і крэсла наскрозь, атрымліваецца. І зразумела, ад чаго памёр гэты п'яніца і дэбіл, як яго... [у зале кажуць — "Тарайкоўскі"]... П'яніца і дэбіл. Ён памёр, вядома, ад гумовай кулі, якая прыляцела яму ў грудзі... Ён стаяў там у майцы, і я думаю, што з адваротнага боку майкі яна не захрасне…

Расійская зброя, траўматычная зброя, з блізкай адлегласці ад баявой нічым не адрозніваецца. Таму што беднаму рускаму чалавеку ад чачэна ці якога-небудзь дагестанца абараняцца трэба..."

Дарэчы, спярша прэс-служба МУС увогуле заяўляла, быццам Тарайкоўскі загінуў ад таго, што ў яго ў руках разарвалася выбуховае прыстасаванне.

Хаця за забойства Тарайкоўскага крымінальнай справы не будзе, суды ўжо прызначылі некалькі рэальных тэрмінаў зняволення тым, хто ўшаноўваў памяць забітага.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.