У Беларусі ўпершыню аштрафавалі за лаянку ў твітары (фота)
Нецэнзурныя выразы мінскага 10-класніка Дзмітрыя Малаковіча на адрас класнай кіраўніцы ацэненыя ў 200 тысяч рублёў.
Як піша "Руская служба навінаў", 16-гадовы школьнік у сваім акаўнце ў твітары апісаў канфлікт з класнай кіраўніцай, які адбыўся ў той дзень. Пры гэтым выказаў нецэнзурную лаянку. Менавіта настаўніца і напісала заяву ў міліцыю.
Справу Дзмітрыя Малаковіча разглядала камісія па справах непаўнагадовых Адміністрацыі Маскоўскага раёна беларускай сталіцы. Штраф павінны заплаціць бацькі хлопца.
У праваахоўных органах пацвердзілі гэтую інфармацыю і дадалі, што падлетка паставілі на ўлік у інспекцыі па справах непаўнагадовых. "Гэта адна з першых спраў у Беларусі, якая датычыць пакарання за нецэнзурныя выказванні ў Twitter", — цытуе словы неназванага праваахоўніка "Интерфакс-Запад".
Фота — rusnovosti.ru
