Улады Грузіі абверглі, што ў Міхаіла Саакашвілі няма тэлевізара ў камеры
Турма ў Руставі, куды змешчаны экс-прэзідэнт Грузіі Міхаіл Саакашвілі / Ілюстрацыйнае фота
Заявы адвакатаў пра тое, што ў былога прэзідэнта Грузіі Міхаіла Саакашвілі ў турэмнай камеры няма тэлевізара, ілжывыя. Пра гэта паведамляе "Інтэрфакс-Украіна" са спасылкай на заяву намесніка гендырэктара спецыяльнай пенітэнцыярнай службы Нікі Цхварыяшвілі.
Паводле слоў чыноўніка, Саакашвілі купіў тэлевізар на ўласныя грошы ў краме Рустаўскай турмы, як і розныя прадметы асабістага карыстання. Пакупкі ён здзейсніў з дапамогай банкаўскай карты, на якой знаходзіцца лімітаваная грашовая сума.
Цхварыяшвілі таксама абверг інфармацыю аб тым, што ў Саакашвілі ў камеры няма матраца і пасцельнай бялізны. За выдачай другога матраца ён да турэмнай адміністрацыі не звяртаўся.
Раней у чацвер адвакаты заявілі журналістам, што ў Саакашвілі няма ў камеры тэлевізара і матраца, нягледзячы на звароты.
Як паведамляла Еўрарадыё, 1 кастрычніка Міхаіл Саакашвілі вярнуўся ў Грузію напярэдадні мясцовых выбараў. МУС Грузіі распачало супраць яго крымінальную справу аб незаконным перасячэнні мяжы. Экс-прэзідэнт быў затрыманы.
